Chantres de St. Joseph, Zéisseng

 

1921-2021: Hiren 100. Anniversaire wollten d'Chantres de St-Joseph vun Zéisseng natierlech ganz festlech gestalten. D'Feierlechkeeten, déi ënnert dem Patronage vum Kulturministère, dem Piusverband an der Stad Lëtzebuerg geplangt waren, si leider der Pandemie zum Affer gefall. Wéini dat alles nogeholl ka ginn steet den Ament nach an de Stären

Déi 24 aktiv Sängerinnen a Sänger, an hir Dirigentin Pascale Philippy kucken op eng laang Geschicht zréck, déi 1921 ënnert dem Numm "Entre nous" ugefaangen huet. An enger Fotoausstellung huet de Kierchechouer, ënnert dem Impuls vun hirem dynamesche President Pierre Duprel, op Léiffrawëschdag 2011 den Historique gemaach an eng laang Retsch vun Aktivitéiten Revue passéiere gelooss – vu Concerten iwwer Massen, Prëssiounen an Theateropféierungen bis hin zu Veräinsausflich an déi méi schwéier Zäit während dem Krich.

Och haut nach séngt de Chouer d'Sonndesmass an op alle kierchleche Festdeeg a gëtt Concerten mat weltlechem Programm.

Donieft schafft de Chouer aktiv an der lokaler Veräinsentente mat. D'Chantres de St-Joseph, déi ëmmer méindes an hirem Sall ënnert der Kierch prouwen, freeën sech iwwer all neie Sänger, fir datt si nët nëmmen mat Stolz zréck-, ma och mat vill Freed no vir kucke kënnen.